မနက်ဖြန်
မနက်ဖြန်ကျရင် ငါတို့အိမ်ပြန်ရတော့မယ်
အဲဒီမနက်ဖြန်ဆိုတာက
ဒီနေ့ရဲ့မနက်ဖြန်လား
သဘက်ခါရဲ့မနက်ဖြန်လား
နောက်တစ်နှစ်ဒီလိုမိုးသည်းနေတဲ့နေ့တစ်နေ့ရဲ့မနက်ဖြန်လား
ဘယ်နေ့ရဲ့မနက်ဖြန်လဲဆိုတာ သေချာမသိဘူး။
သေချာသိတာတစ်ခုက
နေ့တစ်နေ့ရဲ့မနက်ဖြန်တစ်ခုမှာ ငါတို့အိမ်ပြန်ရမှာပဲ။
နေ့တစ်နေ့ဆိုတာကရော ဘယ်လိုနေ့မျိုးလဲ
မအလသေသွားတဲ့နေ့လား
အကြမ်းဖက်ခေါင်းဆောင်တစ်အုပ်စုလုံးမြန်မာ့မြေကထွက်ပြေးသွားတဲ့နေ့လား
သူတို့အုပ်စုတစ်ခုလုံး လက်နက်ချအညံ့ခံလိုက်မယ့်နေ့လား
ဘယ်လိုနေ့မျိုးလဲ
အဲဒါလည်း သေချာမသိဘူး။
သေချာသိတာက
အဲဒီနေ့ရဲ့ မနက်ဖြန်မှာ ငါတို့အိမ်ပြန်ကြမယ်။
ဒီကြားထဲမှာတော့ ငါတို့ဘယ်တော့မှအိမ်မပြန်ဘူး အာဏာရှင်လက်ပါးစေတွေကိုနေ့တိုင်းတိုက်မယ်
ဒီနေရာမှာ ကျည်ကုန်သွားရင်
နောက်တစ်နေရာကတိုက်မယ်
ဒီနေ့ဒဏ်ရာရခဲ့ရင်
ဆေးကုပြီးသက်သာလာတဲ့တစ်နေ့ပြန်တိုက်မယ် တစ်ယောက်ကျသွားခဲ့ရင်
ကျန်ခဲ့တဲ့သူကဆက်တိုက်မယ်။
သေချာတာက
ငါတို့ဘယ်တော့မှအရှုံးမပေးဘူး။
ဘယ်သူတွေ ကမ်းခြေတွေခရီးတွေသွားနေကြပါစေ
ဘယ်သူတွေပဲ မင်္ဂလာဆောင်နေကြပါစေ
ဘယ်သူတွေက သွေးအေးသွားကြပါစေ
ငါတို့အလုပ်ငါတို့လုပ်ကြမယ်လေ
ရှေ့တန်းကိုသွားတဲ့သူသွား
လက်နက်နဲ့ကျည်ရှာတဲ့သူကရှာ
ရိက္ခာစုတဲ့သူကစု
ဆေးကုတဲ့သူကကု
လှူတဲ့သူကလှူ
ကလစ်တဲ့သူက ကလစ်
ရေပေါ်ဆီတွေကိုခဏမေ့ထားကြရအောင်။
သေချာတာက ငါတို့တစ်နေ့နိုင်ကိုနိုင်ရမှာ။
အဲဒီအချိန်ကျရင် ငါရှိပါ့ဦးမလား
မင်းရောရှိပါဦးမလား
မသေချာဘူး
မင်းဖြစ်ဖြစ်
ငါဖြစ်ဖြစ်
ဘယ်သူဖြစ်ဖြစ်
ကျန်နေတဲ့သူတွေအိမ်ပြန်ကြမယ်လေ
အိမ်မှာ မိဘတွေစောင့်နေတယ်
သားသမီးတွေစောင့်နေတယ်
မောင်နှမတွေစောင့်နေတယ်။
ငါတို့အိမ်ရောက်အောင်ပြန်ကြရမှာ။
အဲဒီနေ့ရောက်လာရင်
အိမ်ကိုတန်းပြန်မယ်
မတွေ့တာကြာတဲ့မိသားစုတွေနဲ့တွေ့ကြမယ်
ဖက်ပြီးငိုချင်လည်းငိုမယ်
ပြီးရင် မသောက်ရမစားရကြာပြီဖြစ်တဲ့
ဆိုင်ဖျော်လက်ဖက်ရည်နဲ့ ပေါက်ဆီအဝသွားစားမယ်
နှစ်နဲ့ချီပြီးမညှပ်ခဲ့ရတဲ့
ဂျီးအထပ်ထပ်ဖြစ်နေတဲ့ဆံပင်ရှည်တွေကို
ဆိုင်မှာသွားညှပ်မယ် လျှော်မယ်
အဝတ်အစားအသစ်တွေဝတ်ပြီး
အဝေးကနေ နေ့တိုင်းလွမ်းခဲ့ရတဲ့ရည်းစားနဲ့သွားတွေ့မယ်။
နောက်ပြီးရင်စစ်ကိုင်း၊ ကရင်၊ ကရင်နီ၊ ချင်း၊ ကချင်စတဲ့သူရဲကောင်းဒေသတွေကိုအလည်အပတ်ခရီးသွားမယ်။
သေချာတယ်
အဲဒီမနက်ဖြန်
ငါတို့အိမ်ပြန်ရမယ့်မနက်ဖြန်က
ရောက်လာတော့မှာ။
စောသျှီ
