အမေ့သားကြီး ညာရှာတယ်

အစားအသောက်ဆို ကြေးများ

အသားအငါးမှ စားတတ်တဲ့ ငါ့သား

တောခို ကာ တိုက်ပွဲဝင်ချိန်

ငါးနီတူ ကြော်နဲ့ ပဲဟင်းအရည်စိမ်

ရေနွေးပူပူ သောက်နေရ လည်း

အမေ့ဆီ ဖုန်းဆက်ရှာတယ်

သား အဆင်ပြေပါတယ် အမေတဲ့..။

ယင် ခြင် ကိုက်ကာ ယားယံမှာကြောက်

အအေးမိတာ မပျောက်တတ်တဲ့ ငါ့သား

အာဏာရှင်အရှေ့ ဒူးမထောက်

တာလပတ် တစ်ခုအောက် ရောက်နေလဲ

အမေ့သား နေကောင်းဆဲ ပဲ လို့

အမေ့ဆီ စာလေး ပါးရှာတယ်

သား အတွက် စိတ်မပူပါနဲ့ အမေတဲ့.... ။

ဒီအမေ သိရင် ရင်တွေ ကွဲ

ခံစားရတာ နာကျင်နေမှာပဲလို့

အတွေးပူကာ ငါ့သားလေး ဖုံးကွယ်ရှာလည်း

အမေ သိပါတယ် သားလေး ရေ

ဒီမယ် အမေ့သား....

အာဏာရှင်ပေးတဲ့ ကျိန်စာတရား

အဆင်မပြေလည်း ကျော်ကာ လွှား

တိုင်းပြည် အတွက် အားမာန်များနဲ့

ပြည်သူ့မေတ္တာ အလေးထားကာ တိုက်ထုတ်

အာဏာရှင် သူယုတ်မာ တစ်အုပ်

အမြစ်ပြုတ်တဲ့ အချိန် ဒီအမေ

သားကြိုက်တဲ့ အိမ်ချက် လေးတွေ

ယပ်ခပ် ကာ ကျွေးမွေး ပါရစေ...။

# သျှမ်း