တစ်ယောက်ပြီးတစ်ယောက်ထွက်ခွာသွားတဲ့အခါ
ဟိုဘက်တစ်ခြမ်းမှာ
သမ္မတကမ်းခြေဆိုင်လေး ပြန်ဖွင့်ထားတယ်ကြားလို့
မင်းအမြန် အရောက်သွားတာလား
ကိုလှသန်းတို့ ကိုအောင်ဘညိုတို့
ကိုသိဏ်းသိဏ်းတို့ ကိုမြင့်စိုးတို့
ကိုလူအိမ်တို့ ဦးညွှန့်သစ်တို့
ကိုမင်းနွယ်စိုးတို့ ခက်သီတို့
မင်းကို စောင့်ကြိုနေကြလိမ့်မယ်
တခါတရံမှပေါက်ချလာမဲ့ ဦးအောင်ချိမ့်က
မင်းကို ငေါက်လိမ့်ဦးမယ်
ကဗျာကို
အံတကြိတ်ကြိတ်နဲ့ရေးခဲ့တဲ့ ငါ့သူငယ်ချင်း
လှစ်ကနဲ
ဘတ်စ်ကားပေါ်ခုန်တက်သွားတဲ့ ငါ့သူငယ်ချင်း
ဒီ ညီအကိုမသိတသိ မနက်ခင်းကြီးထဲ
ငါ့ကို မျက်ရည်ကျစေခဲ့တဲ့
ငါ့သူငယ်ချင်း ။
၊#ကြည်ဇော်အေးသို့၊
အောင်ခိုင်မြတ်
No comments:
Post a Comment