ကျန်းမာတဲ့လွမ်းချင်း
ငါ့ဆာလောင်မှုကို
မင်း ကြားသင့်ပါရဲ့
မင်းရဲ့ ဆာလောင်မှုကို
ငါ နားစွင့်နေမိခဲ့
ငါတို့ဟာ ကြိုးနှစ်ချောင်းလို ငြိခဲ့ပေမဲ့
တစ်ယောက်နဲ့တစ်ယောက် ကတိတွေနဲ့
မချည်နှောင်ရက်ခဲ့ကြ
လူမျိုး ၊ ကိုးကွယ်တဲ့ဘာသာ ၊ ပထဝီ အနေအထား
ဘာသာစကားး အတားအဆီးတွေကို ကျော်လွှား
တစ်ယောက် အသားထဲ တစ်ယောက် စူးဝင်ခဲ့ကြ
မမျှော်လင့်တဲ့အခိုက်
တစ်ယောက် ဖိနပ်ကို တစ်ယောက်
ပင်အပ်နဲ့ စိုက်ခဲ့ကြ
ငါက ရက်စက်မိပြီး
မင်းက ရက်စက်ကြည့်တယ်
ငါတို့ဟာ မထင်မှတ်ဘဲ
အာရှကျားတွေရဲ့ ပါးစပ်ထဲ
ဖြတ်ပြေးခဲ့ကြ
အာရှတန်ဖိုး ဆိုတာကို စုံစမ်းရင်း
အာရှကြမ်းပိုးတွေ ဖြစ်မှန်းမသိ ဖြစ်ခဲ့ရ
မိတ်ဆွေတစ်ယောက် ပြောသလို
တစ်ရက်နေရလည်း အမြတ်
နှစ်ရက်နေရလည်း အမြတ် ဆိုတဲ့ ခေတ်ကျပ်ကြီးထဲမှာ
တို့ဘဝတွေ အရင်းကြေခဲ့ပြီလား
ခုတော့ ငါ့အလွမ်းတွေက ကျန်းမာသန်စွမ်းနေပြီး
ငါ့ကျန်းမာရေးက လွမ်းနာကျနေရဲ့ ။ ။
#လှသန်း
No comments:
Post a Comment