နေရောင်ဟာ ကျွမ်းပြန်ကျလာတယ်
-----------------------------------------------------
ခက်သီ
နေရောင်ဟာ မားဆိုးခေါင်းကို ဖြတ်ဝင်လာတယ်
လူတွေဟာ အကုန်သဲကန္တာရချည်းပဲ
လက်ညှိုးထိုးပြီး အမျိုးမျိုးရူးနေကြတာ
စကားလုံးက လေထီးနဲ့ ဆင်းလာတယ်
လုပ်ရပ်က အဝီစိကို လက်နဲ့ယက်ဆင်းနေတာ
တူရကီမှာ ဘာဖြစ်ညာဖြစ် အာဘောင်အာရင်းသန်သန်
၈၈ တုန်းက သတင်းပေးလုပ်ခဲ့တယ်
အခုကျလည်း ပင်နီ တကားကား
ထားလိုက်ပါလေ
စိတ်မကောင်းစရာတွေ ။
နေရောင်ဟာ အလွမ်းကို စူးထိုးတယ်
ကျနော်လည်း သမိုင်းကို ဖုန်းဆက်တယ်
သမိုင်းမှာ သမိုင်းရှိတယ်
ချံပီယံတွေ ပြန်ဆုံဖို့ သစ္စာဆိုခဲ့ကြတယ်
ငါတို့ သစ္စာဟာ ငါတို့ အနုပညာ
စာနာစိတ်မရှိရင် ဘာမှ မရှိတော့ဘူး
ပညာမဲ့ရင် သေတတ်တယ်
နှလုံးသားမဲ့ရင် သံသရာပါ သေသွားမယ်
အနုပညာသမားအချင်းချင်း ချစ်ရမယ်
*ဟေ့ ဘီလူးစည်း လူ့စည်း ရှိတယ်*-1
*အချင်းချင်းတွေကွဲ ရန်မဖြစ်ကြနဲ့*-2
နေရောင်ခြည်ဟာ ရောဂါပိုးကို သေစေတယ်
ငါတို့ အနုပညာနဲ့ လူ့ဘောင် ကိုယ်ခံအားကို မြှင့်တင်ပေးမယ်
ငါတို့ လောင်ကျွမ်းခံ၍လေ
ဒါပေမယ့် ငါတို့ အသေမခံဘူး
ပြန်လာမယ် ။ ။
ခက်သီ
No comments:
Post a Comment