|| ​​ခြေရည်ပျက် လူငယ်ဘဝများ || 

======================

တရုတ်ဖြစ် ဂျင်း​ဘောင်းဘီ အိပ်ကပ်ထဲ လက်ထိုးနှိုက် 

ဆံပင်ကို ​စျေး​ပေါ​ပေါ ဂျယ်လ်နဲ့ မတ်မတ်ရပ်

ကိုယ့်မြို့ကိုယ် သူများ​တွေက နယ်လို့​ခေါ်မှန်းမသိခဲ့ရတဲ့နှစ်များ 

စစ်​အေးကာလ အဆုံးသတ်ပြီးချိန်မှ 

ပူပူ​လောင်​လောင် ​မွေးဖွားကြီးပြင်းရသူ​တွေ

ဘာလင်တံတိုင်းပြိုကျတာ မမီ​ပေမယ့် 

​ကျောင်းနံရံကို ​ကျော်ပြီး ကွမ်းယာဆိုင်သွားထိုင်လို့ရမှန်း သိ​နေခဲ့တဲ့နှစ်များ 

ကမ္ဘာကြီးကို ​ချောင်းကြည့်​​ပေါက်ထဲကကြည့်ဖို့ 

အင်တာနက်ဆိုင်က ကွန်ပျူတာထဲ ရိုက်ထည့်လိုက်​တော့လဲ ပွန်းန်ဆိုဒ်နဲ့ ဂျီ​တော့ခ် ပဲ 

ဒီ့ထက်ပိုပြီး တက်မလာ 

ဒီ့ထက်ပိုပြီး တတ်မြောက်မလာ 

ဒီ့ထက်ပိုပြီး မွဲ​ခြောက်လာခဲ့ယုံ

ဆံပင်ကို ရန်ရှာ 

​ခေတ်​ရေစီး​​ကြောင်းကို ရန်ရှာ 

​ကျောင်းပညာ​ရေးကို ရန်ရှာ 

ငါတို့ လူလား​မြောက်တဲ့​ခေတ်ဟာ

လက်ခလယ်​ထောင်ပြချင်ရင်​တောင် 

ဘယ်သူ့ကို လက်ခလယ်​ထောင်လို့ ​ထောင်ပြရမှန်းမသိ 

အသင့်စားသုံး ဘာသာ​ရေး 

အရက်နဲ့ စီးကရက် 

ကမ္ဘာ​ပေါ်မှာ ဘာဝါဒ​တွေ ​ခေတ်စားမှန်းမသိ​

နယူးဟမ့်ရှိုင်းယား က ​အထက်တန်းကျောင်းသား​လေးတစု ​မောင်းသူမဲ့ ​ထောက်လှမ်း​​ရေးဒရုန်းကို ထွင်လိုက်တဲ့အချိန် 

ငါတို့က တစ်ရာတန် သီချင်းစာအုပ်ကို သုံးယောက်စုဝယ်ပြီး ဂီတာလက်ကွက်​တွေ ကြည့်တီးလို့​ကောင်းတုံး 

အတန်းထဲက တရုတ်မ​လေးကို စာလိုက်​ပေးတဲ့​ကောင်ကို ​ကျောင်းဆင်းချိန် ဆွမ်းကြီး​လောင်းဖို့ ချိန်းကြိုး​တွေ ပြင်လို့​ကောင်းတုံး 

ကမ္ဘာသုံး ဘာသာစကား​ပြောသင်တန်း တက်နိုင်တဲ့​ကောင်ကို ​ငေးကြည့်ရ 

အယ်လ်စီစီအိုင် အဆင့်နှစ် တက်ခဲ့ဖူးတဲ့ သူငယ်ချင်းမကို ​မော့ကြည့်ရ 

​ငွေ​နောက်​ပြေးလိုက်ဖို့ အိမ်နီးချင်းနိုင်ငံ​တွေဆီထွက်သွားပြီး ပြန်လာတဲ့ ​ဘော်ဒါကို အားကျရ 

​ဘော်ဒီရှိန်းမင်းမသိ

ချေ​ဂွေဗားရား မသိ 

​တော်လှန်​ရေး မသိ 

ဧရိယာငါးဆယ့်တစ်ကို မသိ

ဆိုက်ဘာစစ်ပွဲဖြစ်ခဲ့တာကိုမသိ 

အဆုံးစွန်​သော ကမ္ဘာကို​ခြေဆန့်မှုအဖြစ် 

အင်အား ဂျာနယ်ဖတ်ပြီး ​ဘောလုံးပွဲ​လောင်းခဲ့ယုံသာ 

ငါတို့ လူငယ်​ခြေရည်ပျက် ဘဝ ။ 

ပိုင်သစ်မိုဃ်း

​အောက်တိုဘာ၊​အေဒီ၂၀၂၁