ဖြေတွေး(၃)

*********

သက်သတ်လွတ်ကျည်ဆန်တစ်တောင့်

ရယ်လို့ကြားဖူးပါစ/သလား။

ဖားကြောင့်အသံတွေသေခဲ့ရတာ

သင်သိပါသလား/ပါစ။

လှေကြောင့်ငါးတွေပုပ်ကုန်တာ

တွေ့ဖူးသလား/ပါစ။

ဂိုးသွင်းစံချိန်တင်တဲ့ဂိုးသမား

ကြုံဖူးသလား။

ကိုယ့်နာမည်ကနေနုတ်ထွက်သွားတဲ့လူတွေကတော့

အများသားပါကလား။

ဘာအရက်သောက်တာလဲဆိုတာထက်

ဘယ်သူနဲ့သောက်တာလဲဆိုတာ

ပိုအရေးကြီးတယ်။

အလှူခံပုံးထဲငွေထည့်ဖို့ထက်

ခါးပိုက်နှိုက်ဖို့ကပိုခက်တယ်ဆိုတာ

တွေးမိသလား။

အမြင့်ဆုံးတော်လှန်ရေးထဲမှာ

အိပ်ချင်စိတ်ကိုတွန်းလှန်ရတာ

အခက်ဆုံးဆိုတာလက်ခံပါသလား။

ကိုယ့်ကိုယ်ကိုယ်ပြန်ဖားနေတဲ့လူကို

မြင်ဖူးပါသလား။

မြစ်ကစီးဆင်းသွားတာမဟုတ်ဘူး

မြေကြီးကရွေ့သွားတာ။

သူခိုးကိုယ်တိုင်ကထိုးကွင်းနဲ့ဆိုတော့

ကျွန်တော်ပဲပြေးရတော့တာပေါ့။

ရွာတောင်ဆုံးနေပြီ

လမ်းကမတွေ့သေးဘူး။

မုန့်ဆီကြော်တွေလည်း

ထူးထူးခြားခြားသိုးကုန်ပြီ။

နှုတ်ခမ်းနာကမပေါက်သေးတာခက်တယ်။

ကမ္ဘာ့အကြီးဆုံးလက်ထိတ်ကြီးနဲ့

ခတ်လို့ရပါသလား။

အဆိုးဆုံးရာဇဝတ်သားမို့

အကြီးဆုံးလက်ထိတ်နဲ့ခတ်လို့ရပါသလား။

ကိုယ့်အမှားကိုပြုပြင်ဖို့ထက်

ခွင့်မလွှတ်ရကောင်းလားလို့

ပြန်ပြီးအပြစ်တင်လို့ရပါသလား။

လမ်းမှားတွေအများကြီး

လမ်းမှန်ကတစ်ခုတည်း။

အခက်တကာ့အခက်ထဲမှာ

လူကောင်းယောင်ဆောင်ရတာ

အခက်ဆုံးပဲ။

သဘောထားကွဲလွဲခြင်းဟာ

ညီညွတ်ခြင်းရဲ့လမ်းစပဲ။

ရွှေဆယ့်ငါးပဲရည်ကိုမမြင်ဘူး

ကြေးတစ်ပဲသားကိုမြင်တယ်။

ဆွမ်းဆန်ထဲကြွက်ချေးရောတာနဲ့

အိမ်သာတွင်းထဲလက်စွပ်ပြုတ်ကျတာ။။

#ဆရာမင်းလူ