အကြောင်းကြောင်းကြောင့်

အကြောင်းကြောင်းကြောင့်

----------------------

အကြောင်းကြောင်းကြောင့်

ရွဲ့စောင်းနေတဲ့ ကမ္ဘာကြီးမှာ လူဖြစ်ခဲ့ရတယ်

အကြောင်းကြောင်းကြောင့်

ဆံပင်အရောင်တွေ ပြောင်းလဲသွားကြပြီ

အကြောင်းကြောင်းကြောင့်

အရောင်းအဝယ် မကောင်းတဲ့နေ့တွေမှာ နေခဲ့တယ်

အကြောင်းကြောင်းကြောင့်

ခေတ်ကာလကို လက်ဝါးစောင်းနဲ့ ခုတ်ချင်တယ်

အကြောင်းကြောင်းကြောင့်

မြောင်းထဲက ဘဝတွေကို လိုက်ဆယ်နေမိတယ်

အကြောင်းကြောင်းကြောင့်

စာအုပ် အဟောင်းတွေကို ပြန်ဖတ်နေရတယ်

အကြောင်းကြောင်းကြောင့်

ကိုယ့်ဘဝကိုယ် ပြန်ချောင်းကြည့်မိတယ် 

အကြောင်းကြောင်းကြောင့်

အဝတ်ဟောင်းတွေ ဝယ်ဝတ်နေရတယ်

အကြောင်းကြောင်းကြောင့်

တစ်နေရာကနေ တစ်နေရာကို ပြောင်းခဲ့ရတယ် 

အကြောင်းကြောင်းကြောင့်

ငယ်ငယ်တုန်းက အကြောင်းတွေ

မတွေးတော့ပါဘူး

အကြောင်းကြောင်းကြောင့်

သူရဲကောင်းတွေနဲ့ ပေါင်းသင်းနေထိုင်မိတယ်

အကြောင်းကြောင်းကြောင့်

ခေါင်းမီးတောက်တဲ့ ညတွေနဲ့ ကြုံခဲ့တယ်

အကြောင်းကြောင်းကြောင့်

နောက်ဘဝအကြောင်းကို မေ့နေမိတယ်

အကြောင်းကြောင်းကြောင့်

ရှိစုမဲ့စုလေးတွေ ထုတ်ရောင်းခဲ့ရတယ်

အကြောင်းကြောင်းကြောင့်

ခေါင်းလောင်းသံတွေနဲ့ ဝေးခဲ့ပါပြီ

အကြောင်းကြောင်းကြောင့်

ဘောလုံးပွဲတွေအကြောင်း ပြောနေရတယ်

အကြောင်းကြောင်းကြောင့်

အကောင်းမြင်စိတ်တွေ မွေးနေရတယ်

အကြောင်းကြောင်းကြောင့်

အမျိုးသမီး တစ်ယောက်အကြောင်း

တွေးနေမိတယ်

အကြောင်းကြောင်းကြောင့်

သင်္ချိုင်းကုန်းကို မျက်စောင်းထိုးနေမိတယ်

အကြောင်းကြောင်းကြောင့်

ကိုယ့်အလောင်းကိုယ် ပြန်ထမ်းရမလို ဖြစ်နေပြီ

အကြောင်းကြောင်းကြောင့်

ဇာတ်ပေါင်းခန်းကို ရင်ခုန်နေမိတယ်

အကြောင်းကြောင်းကြောင့်

ဘဝနဲ့ ရင်းရတဲ့ လောင်းကစားဝိုင်းထဲကို ဝင်မိတယ်

အကြောင်းကြောင်းကြောင့်

လက်ခမောင်း ခတ်ရမယ့်နေ့ကို မျှော်မိတယ် ။      ။

#လှသန်း