အိပ်မက်ရဲ့အခိုးအငွေ့များ

အိပ်မက်ရဲ့အခိုးအငွေ့များ

---------------------------------------

ဆယ်လမန်ရပ်ရှဒီရယ်

တာဆီလီမာနာဆရင်းရယ်

ကျွန်တော်ရယ်

ကမ္ဘာ့ ချောင်ကြိုချောင်ကြားမှာ

စကားဝိုင်းဖွဲ့ဖြစ်ကြတယ် ။

ကမ္ဘာကြီးထဲမှာ

ကဗျာရွာလေး တည်ချင်တယ်

အောက်တာဗီယိုပါ့ဇ်

ဒါမှမဟုတ် ရှေးမော့စ်ဟေနီကို

သူကြီး တင်မြှောက်ရင် ကောင်းမလား ။

လူ့ဘဝဆိုတာ

အနက်ရောင်နဲ့ ပုံနှိပ်ခံရတဲ့ နေ့တွေချည်းပဲ မဟုတ်ပါဘူး

တစ်ပတ်တစ်ခါ အနီရောင်နဲ့ ပုံနှိပ်ခံရပါသေးတယ်

ကျွန်တော်တို့ မှားချင်လည်း မှားမယ်

အဲဒီလို ကြားထဲက

တစ်ယောက်ဘဝကို တစ်ယောက် ငှားကြည့်မိကြတယ် ။

အရှိန်ရနေတဲ့ သီချင်းတစ်ပုဒ်ကို

ဇာတ်ကြိုးနဲ့ မတုံ့လိုက်ပါနဲ့

ကိတ်မုန့်ကို လှီးတဲ့ ဓားဟာ

ကိတ်မုန့်အရသာကို သိစရာ မလိုပေမဲ့

လူဖြစ်ခဲ့ရလို့ လူ့ဘဝ အရသာကို မြည်းကြည့်ချင်ပါတယ် ။

နွားနို့တောင်မှ ချဥ်သွားရင်

ဒိန်ချဥ် ဖြစ်သွားသေးတာပဲ

လူ့ဘဝကို ရိုးရိုးသားသား ခုံမင်တယ် ။

အမြိုက်ရေကြည် နှစ်ပက်လောက်နဲ့

ဟောဒီ နေ့တွေကို စွဲချက်မတင်လို

ကျွန်တော် မိခင်တွေကို ကြည်ညိုတယ်

ကလေးတွေကို လေးစားတယ်

စာလုံးပေါင်း အမှားတွေကို ဒီအတိုင်း ထားလိုက်ပါတော့ ။

ရထားတွေ အော်ကုန်ပြီ

ငှက်တွေ အော်ကုန်ပြီ

စျေးသည်တွေ အော်ကုန်ပြီ

မနက်တစ်ခွက် ဖျော်သောက်ဖို့

အိပ်ရာက ငေါက်ခနဲ ထထိုင်မိပြန်ပေါ့။         ။

#လှသန်း