မေရီ -၃

ကော်ဖီရဲ့ ခါးသက်မှုဟာ

ဘဝနဲ့ယှဉ်ရင် အမှုန်အမွှားမျှသာဖြစ်ကြောင်း

သိုးမွှေးချည်မျှင်တွေကြားထဲက

မေရီ့လက်ဆစ်ကလေးတွေက ပြောနေကြတယ်

ဘဝကို ကိုယ့်သဘောကျ

ချုံ့လို့ချဲ့လို့ မရတာကိုတော့

မေရီ အနည်းငယ်ဝမ်းနည်းမိတယ်

ပေါင်မုန့်အသိုးနဲ့တူတဲ့ လူတွေ ပေါ်လာတော့

ဖွင့်ထားတဲ့ tv channel ကို ပိတ်လိုက်တယ်

အချိန်နဲ့ဒီရေက လူကိုမစောင့်လည်း

ငွေရှိရင်တော့ တရားကလူကိုစောင့်တတ်ကြောင်း 

မေရီ သိထားတယ်

ကျွတ်သွားတဲ့ ဆံမျှင်ဟောင်းတွေကြား

သေနတ်ဒဏ်ရာနဲ့ သူ့အမျိုးသားရဲ့မျက်လုံးတွေကို

မကြာခဏ မေရီ ပြန်တွေ့နေရတယ်

ဘုရားသခင်နဲ့သာ တိုက်ရိုက်စကားပြောခွင့်ရမယ်ဆို

အာလူးစားကြတဲ့သူအချင်းချင်း

မြေနိမ့်ရာကိုရွေးပြီးလှံစိုက်နေတာကို တားမြစ်ပေးဖို့

မေရီ တောင်းဆိုချင်ပါတယ်

ဒီတစ်ပတ် စစ်ဘေးရှောင်စခန်းကိုသွားတဲ့အခါ

ကလေးတွေကို

စင်ဒရဲလားပုံပြင်မပြောဘဲ

မင်ဒဲလားအကြောင်းပြောပြဖို့လည်း

မေရီ စိတ်ကူးထားပါတယ်     ။

#ပိုပိုဖီးနစ်