မျက်ရည်အားအင်

ညကမှောင်မိုက်လွန်းလှတယ်

လအပေါ်ကိုလည်း တိမ်စိုင်တွေ အုပ်မိုးလို့ထားတယ်

တရွေ့ရွေ့ပြေးနေကြတဲ့တိမ်တိုက်တွေကလည်း    

လွမ်းဆွေးစရာကောင်းပြန်တယ်  

ကောင်းကင်တစ်ခုလုံး  

မည်းမှောင်လို့နေတယ်

တိမ်စိုင်တစ်ချို့ဟာ ဆိုလျှင်များ 

လူအရိုးစုပုံစံနဲ့တောင်  

တူများတူလိုက်ပါပေတယ်

ကြယ်တွေအကြောင်းလား  

မမေးပါနဲ့တော့ဗျာ 

သိပ်ကိုရင်နာစရာကောင်းတယ်

ဓူဝံကြယ်ဟူသည်  မှေးမှိန်ရိုးထုံးစံမရှိ 

တိမ်ဘယ်လောက် အုပ်ဆိုင်း  အုပ်မှိုင်း

တရေးနိုးထကြည့်တောင်

အဆုံးမရှိ လင်းလက်မယ့်ကြယ် 

ပြောစရာစကားလုံးအစအန ရှာမရလောက်အောင်ကို   

ဗလောင်ဆူလွန်းလှတဲ့  ဒီရင်

တဆစ်ဆစ်နဲ့နာကျင်လွန်းရတဲ့  ဒီအသည်းစုံ 

စက္ကူခပ်ပါးပါးတစ်ရွက်ပေါ်  

ကျတဲ့မျက်ရည်  

ကဗျာတစ်ပုဒ်နဲ့ပဲ  သုတ်လိုက်ချင်ပါတယ်

ညအမှောင်ထဲမှာ  ကြယ်ရောင်တဖျဖျနဲ့

လမ်းပျောက်တဲ့ငါဆိုသည်မှာ 

ရှေ့ဆက်လျှောက်ဖို့  အားအင်သစ်တစ်ခုရပြန်ပြီ 

   ThaeNu