မင်းတို့ ကယ်တင်မှုကြီး ပြီးတော့
လှလှပပကြီး
မင်းတို့ကယ်တင်မှုကြီး ပြီးတော့
ငါတို့ကလေးတွေအတွက် ပညာရေးကြီး မရှိတော့ဘူး
ကျောင်းကိုသူတို့ သွားကြတယ်
ကျူရှင်ကို သူတို့ သွားကြတယ်
စာကျက်ဝိုင်းတွေဆီ သူတို့သွားကြတယ်
ပြေးလွှားဆော့ကစားဖို့ အချိန်တွေ
အော်ဟစ်ရယ်မောဖို့ ညနေတွေ
ပူသောရာသီဥတုထဲ ချွေးတွေ
မိသားစုထမင်းလက်ဆုံညစာတွေ ပေးပြီး
ဘဝတွေပေးပြီး
မင်တို့ကယ်တင်မှုကြီး ပြီးတော့
သူတို့အတွက် ပညာရေးကြီးလဲ ပြီးသွားတော့တယ်။
ကြွကြွရွရွကြီး
မင်းတို့ကယ်တင်မှုကြီး ပြီးတော့
တိုင်းပြည်ဟာ နှစ်ပေါင်းငါးဆယ်
တစ်နှစ်ထက် တစ်နှစ်ပိုသိမ်ငယ်လို့
တစ်ယောက်နဲ့ တစ်ယောက် ပစ်သတ်တဲ့ သွေးတွေစေးကပ်လို့
တစ်ယောက်နဲ့ တစ်ယောက် နောက်ကျောမှာ ဓားတွေစိုက်လို့
တစ်ယောက်ခေါင်းကို တစ်ယောက် သေနတ်နဲ့ထောက်ပြီး
ခလုတ်တွေ လွယ်လွယ်လေးဆွဲလို့
တစ်ဖက်နဲ့ တစ်ဖက် ဆဲဆို မုန်းတီးလို့
မင်းတို့ကယ်တင်မှုကြီး ပြီးတော့
မင်းတို့လည်း ဘာကိုကယ်တင်ရမှန်း မသိတော့
တိုင်းပြည်လည်း ဘာကို ကုန်းကောက်ရမှန်း မသိတော့တယ်။
ပျော်ပျော်ရွှင်ရွှင်ကြီး
မင်းတို့ ကယ်တင်မှုကြီးပြီးတော့
ငါတို့ လူငယ်တွေလက်ထဲ နိဗ္ဗာန်တွေ အပြည့်
အရက်မစစ်တဲ့ အရက်ဆိုင်လေးတွေကနေ
ကွမ်းယာဆိုင်တွေမှာတောင် ရနိုင်တဲ့ WYတွေ
သောက်မလား ရှူမလား ထိုးမလား ဘိန်းဖြူတွေ
ပိုက်ဆံမရှိဘူးလား ရမယ်ဆိုတဲ့ ကော်တွေ
ပျော်ရွှင်မှုစံနှုန်းတွေ မြင့်မြင့်ကြီးမြင့်လို့
မင်းတို့ကယ်တင်မှုကြီးပြီးတော့
ငါတို့ လူငယ်တွေဟာ ကမ္ဘာမှာ ဒုတိယဖြစ်လာတယ်
မင်းတို့မှန်းထားတဲ့ ပထမလေးနဲ့လွဲခဲ့လေသလား
အားနာပါတယ်။
ကော့ကော့မော့မော့ကြီး
မင်းတို့ကယ်တင်မှုကြီး ပြီးတော့
ခရိုနီကြီးတွေ ပွဲတိုင်းကျော်လာတယ်
ပရဟိတနိုင်ငံတော်ကြီးဖြစ်ရမယ်လို့ သူတို့အော်သွားတယ်
ငါတို့မိတ်ဆွေတွေဟာလဲ ဓာတ်ပုံထဲပြုံးတတ်သွားတယ်
သယံဇာတတွေပေါတဲ့တိုင်းပြည်တဲ့
သုံးခိုင်းပါတယ်ပြောမှ ကုန်းခိုင်းမိသလို
ငါတို့လည်း သူတို့ကိုပဲ အလေးပြုရတော့ မလိုလို
မင်းတို့လည်း သူတို့ကိုပဲ သွားရေတမြားမြားကျရတော့မလို
မင်းတို့ကယ်တင်မှုကြီး ပြီးတော့
ငါတို့မှာ နွားကိုပဲ ဘုရားထူးရတော့ မလိုလို
စားဖားတွေ ညီညွတ်ရေးနဲ့ အသက်ရှည်ရှည် ခင်ခင်မင်မင်။
စေးစေးပိုင်ပိုင်ကြီး
မင်းတကယ်တင်မှုကြီး ပြီးတော့
တောင်သူတွေလည်း စိုက်စရာမြေမရှိတော့ဘူး
သိမ်းပြီးသား တပ်ပိုင်မြေနဲ့
၀ယ်ပြီးသား ခရိုနီကြီးပိုင်မြေနဲ့
အမတော်ကြေးတွေ နှမ်းစေ့နဲ့
သမချေးငွေ ပဲစေ့နဲ့
ကုန်သည်ကြိုပေးငွေ အကြွေးလည်အစ်နဲ့
စိုက်လည်းရှုံး မစိုက်လည်းမွဲပြာ
မင်းတကယ်တင်မှုကြီး ပြီးတော့
ပဲစိုက်သူတောင်သူကြီးခဗျာ စားအုန်းဆီတွေစားလို့
မင်းတို့ လက်ဖက်ခွက်ထဲက ပဲဆီရွှဲရွှဲကို ငေးရရှာ။
ဖုထစ်လှပကြီး
မင်းတို့ကယ်တင်မှုကြီး ပြီးတော့
အနုပညာ ဖက်ခွက်စားထက်ဆိုးပြီး
အနုပညာ ဖာခံစားနဲ့ ဖာခေါင်းတွေ ပေါလာတယ်
ကော်ပီကားနဲ့ ကော်ပီစာသားတွေ ပေါလာတယ်
ဆယ်လီနဲ့ ဆယ်ဖီတွေပေါလာတယ်
ကဗျာကိုသူကပဲ လုပ်ကျွေးပြုစုထားရသလိုလို
သူကပဲ ပန်းချီကို စတီထွင်ခဲ့သလိုလို
ကလေးတွေကြည့်ဖို့ ကာတွန်းကားတွေ ရေးခဲ့သလိုလို
ပြည်တွင်းစစ်ကြီး အေးဖို့ သီချင်းတွေရေးခဲ့သလိုလို
ပုဂံဘုရားတွေ သူပဲဆောက်ခဲ့သလိုလို
လိုလိုကောင်တွေ
မင်းတကယ်တင်မှုကြီး ပြီးတော့
ငါတို့ ငေးငေးကြည့်ရတဲ့ အတိုင်း
မင်းတို့ ပြေးပြေးကြည့်ရတဲ့ မဟာလူသားတွေ အပုံလိုက်။
ပေါ့ပေါ့ပါးပါးကြီး
မင်းတို့ကယ်တင်မှုကြီး ပြီးတော
နိုင်ငံတော်ကို လက်နှစ်လုံးအလိုမှ ကယ်တင်ပြီးလို့
ဝါဒဖြန့်ပြီးသွားပြီ
လက်ပတောင်းတောင်လည်း တစ်၀က်တိတိကနေ အကုန်ထိ သေချာသွားပြီ
ထောက်ပံ့သူကြီးတွေက နိုင်ငံကို တစ်ပိုင်း
ဦးပိုင်က တစ်ပိုင်း
အာဏာနို့စို့ခွေးတွေက တစ်ပိုင်း
ကျန်တစ်ပိုင်းကလဲ ရွှေပြည်အေးတွေလက်ထဲ အေးစက်လို့
မင်းတကယ်တင်မှုကြီး ပြီးတော့
မင်းတို့ ရဲဘော်တွေသေသွားသလို
တိုင်းသူပြည်သားတွေလဲ သေသွားခဲ့ရတယ်။
ခံ့ခံ့ညားညားကြီး
မင်းတို့ကယ်တင်မှုကြီး ပြီးတော့
လူတိုင်းလူတိုင်းဟာ ထင်သွားကြတယ်
သူတို့ခေါင်းက ဒေါ်အောင်ဆန်းစုကြည်ခေါင်း ဆယ်လုံး
သူတို့လက်တွေက ချေဂွေဗားရား တစ်ရာ
သူတို့ခြေတွေက စပါတာကပ် တစ်ထောင်
သူတို့ယုံကြည်မှုက မာတင်လူသာကင်း တစ်သောင်း
သူတို့နှလုံးသားက သခင်ကိုယ်တော်မှိုင်း တစ်သိန်း
သူတို့သိမှုက ဝီကီပီးဒီးယား တစ်သန်း
သူတို့ဟောကြားမှုက ဘုရားတစ်ကုဋေ
မင်းတို့ ကယ်တင်မှုကြီး ပြီးတော့
ငါတို့တွေ ရလိုက်ပုံများ
ဂရင်းနစ်ကတောင် မှတ်သားယူရတယ်။
မျိုးမျိုးမြတ်မြတ်ကြီး
မင်းတို့ကယ်တင်မှုကြီး ပြီးတော့
အလှူခံ မဏ္ဍပ်ကြီး ဆောက်ကြ
ဖာတန်းလို စျေးတွေညှိကြ
ရွှေပြည်အေးလို ညစာတွေစားကြ
ဆရာ၀န်နဲ့ ဆေးရောင်းသူတွေ လက်ဝါးချင်း ရိုက်ကြ
လူမှုကွန်ရက်ပေါ် အပိန်းထောင်ပြိုင်ကြ
ဆဲရေးမှု ဘာသာစကားကို ဆန်းသစ်ကြ
ရန်ငါ မိတ်ဆွေမကွဲ ကဲ့ရဲ့ကြ
မင်းတို့ကယ်တင်မှုကြီး ပြီးတော့
မင်းတို့ ကျက်လက်စ ကျမ်းစာအပိုင်းအစလေးကို
ငါတို့တွေ နားမလည်ခဲ့သလိုလို
စုပ်တသတ်သတ်
ငါတို့တိုင်းပြည်ကြီး
မင်းတို့စေတနာကြီးနဲ့ ဝေးခဲ့သလိုလို
ကမ္ဘာကြီးပဲ ကံခေခဲ့သလိုလို။
-မြတ်ဝေ
၁၉၊ ၂၊ ၂၀၁၇
