#အမှန်တရားပေါ်ကကဗျာများ
တခါတရံ လမ်းစပျောက်သူတွေကို
ယုံကြည်မှုနဲ့တွဲထူ
ချစ်ခြင်းတရားနဲ့ အလင်းပေး
မျှော်လင့်ချက်တွေနဲ့ ရှေ့ဆက်နိုင်စေဖို့ရာ
အပြန်အလှန်နားလည်ပေးနိုင်တဲ့
လူသားဆန်ဆန် ကဗျာတွေ
ဒီတစ်မိုးအောက်မှာရှိတယ်။
မတရားမှုကို တော်လှန်
ရဲရဲတောက် တိုက်ပွဲဝင်နေတဲ့
သူရဲကောင်းတွေကို
စိတ်ဓာတ်ခွန်အားဖြစ်စေမယ့်
ကဗျာတွေရှိသလို
အာဇာနည်တွေအားလုံးရဲ့
သမိုင်းမော်ကွန်းကို ကမ္မည်းထိုး
ဘယ်တော့မှ
အမေ့ပျောက်ခံ မဖြစ်ရလေအောင်
အမှတ်ရနေစေမယ့် ကဗျာတွေဟာလည်း
ငါတို့နှလုံးသားထဲမယ် ရှိသေးတယ်။
အာဏာရှင်စနစ်ဆိုးကို ဇီဝိန်ချွေဖို့အရေး
တရားမျှတမှုအတွက် တော်လှန်နေတဲ့
ကဗျာတွေဟာလည်း ဒီကာလဆိုးကြီးထဲ
ကျည်အပြည့်ဖြည့်ထားတဲ့ လက်နက်တွေအလား
ဘယ်တော့မှ လက်လျော့မသွား
တရားမျှတပြီး လွတ်လပ်ခွင့်ရဖို့
တိုက်ပွဲဝင်နေကြဆဲ။
ခေတ်အဆက်ဆက်
အမှန်တရားအတွက် ကဗျာရေး
ထောင်အကျခံ အသက်ပေးခဲ့တဲ့
ကဗျာဆရာတွေနဲ့ ကဗျာတွေဟာ
အမှန်တရားနဲ့ ကဗျာတွေကို
မြတ်နိုးသူတွေတိုင်းရဲ့
ရင်ထဲမှာရော သမိုင်းမှာပါ
ရှင်သန်နေဆဲဖြစ်သလို
"အဆုံးထိတိုက်မယ်
ငါတို့နိုင်ကိုနိုင်မှာလို့" ယုံကြည်ထားတဲ့
ငါတို့အယောက်စီတိုင်းဟာ
ဒီကဗျာဆရာတွေရေးထားခဲ့တဲ့
အမှန်တရားရဲ့ လမ်းပေါ်မှာ
တိုက်ပွဲဝင်နေတဲ့ ကဗျာတွေသာဖြစ်တယ်။
#POSEIDON
No comments:
Post a Comment