ကိုယ့်ဖိနပ်ဟာ ကိုယ့်ခံတပ်ပါပဲ

ကိုယ့်ဖိနပ်ဟာ ကိုယ့်ခံတပ်ပါပဲ

----------------------------------------------

ကျန်းမာရေး မကောင်းလို့

ဝင်ငွေ မကောင်းလို့

မိုးလေဝသ မကောင်းလို့

ခုလို အခက်အခဲတွေထဲမှာ

ဖိနပ်သည်းကြိုးကို သတိထားနေရ

ခုံကလည်း လှုပ်လှုပ်

မြင်းကလည်း လှုပ်လှုပ်

ပြုတ်ကျသွားချင်လည်းသွား

ဒုက္ခဆိုတာ သစ္စာတရား

ကျွန်တော့်ရဲ့ မိုက်မဲမှုများ

လောကကြီးက အလိုက်သိပါ့မလား

ရေပြင်ရဲ့ မာယာကို မုန်းတယ်

ပိုက်ကွန်ထဲက ငါးတွေကို သနားတယ်

ထောင်ချောက်ကို လိုက်ရှာနေတဲ့

သားကောင်ဆိုတာ ရှိပါ့မလား

ပျော်ရွှင်မှုဆိုတာ လှောင်အိမ်ထဲမှာ မမွေးဖွားဘူး

ပြိုင်ကားတစ်စီးလို ဓာတ်ဆီဖြုန်းခဲ့ပြီးပြီ

လူနာတင်ယာဥ်တစ်စီးလို အသုံးဝင်ချင်တယ်

ရော့ခ်အင်ရိုးလ် တစ်ခေတ်လုံးကို နားထောင်ခဲ့တယ်

ပွင့်လင်းတဲ့ လူ့ဘောင်ကို မျှော်လင့်မိတယ်

ကဗျာနဲ့ ဘဝကို ချည်နှောင်ထားခဲ့တယ်

သူငယ်ချင်းရယ် ဒီဇာတ်လမ်းမှာ

လူဆိုးတွေ တစ်ယောက်မှ မသေသေးဘူးလား

လူကောင်းတွေမှာ ဒုက္ခများလှပါပြီကွယ်

အသက်တစ်ချောင်းလုံး ဆုံးရှုံးမယ်ဆိုရင်

နာမည်တစ်လုံးတော့ အဖတ်တင်ချင်တယ်

ချောက်ကမ်းပါးစွန်းက လူကို

တွန်းအားတွေ မပေးကြပါနဲ့

ပြေးစရာမြေ မရှိတော့တဲ့အခါ

ကိုယ့်ဖိနပ်ဟာ ကိုယ့်ခံတပ်ပါပဲ ။        ။

#လှသန်း