"ခင်ခင်ပျိုရေ အသက်ရှူငွေ့များ"
ဓာတ်ကြိုးတန်းပေါ် ခိုတွေသီးလို့
သစ်သားအိမ်ကလေးရှေ့ ရောင်စုံပူဖောင်းတွေ လွင့်လို့
ရပ်ကွက်ကလေးဟာ အသက်ဝင်လာလို့
လူတွေ အသက်ဝင်လာလို့ ။
သွားကြ ၊ လာကြ
ကြံကြ ၊ ရှာကြ ။
ခင်ခင်ပျိုရေ
ငါ စောင့်ခဲ့တယ် ။
ဒီလို တစ်နေ့ဟာ
တစ်နေ့ပြီး တစ်နေ့
ငါတို့ဟာ တစ်ကွေ့ပြီး တစ်ကွေ့
ငါတို့ဟာ တစ်ရွေ့ပြီး တစ်ရွေ့
ငါတို့ဟာ တငွေ့ငွေ့ ။
ငါတို့ ဘယ်ရထားမှာ လွဲခဲ့သလဲ
တစ်ခါလွဲရင် နှစ်ပေါင်းဘယ်လောက် ကြာတတ်လဲ ။
ခင်ခင်ပျိုရေ
ငါ စောင့်ခဲ့တယ် ။ ။
-အောင်ချိမ့်
No comments:
Post a Comment