ဘာတွေဖြစ်ကုန်ကြပြီလဲ 

အမေကျော် ဒွေးတော်မလွမ်းရဘူးတဲ့

အဖေကျော် ပေါက်ဖေါ်လွမ်းရမယ်ဆိုပဲ ။

မီးတပ် ရေတပ် လေတပ် တွေဆိုလား

တပ်မတော်သာလျှင်နိုင်ငံအမြတ်ကို

သိမ်းကြုံးယူလိမ့်မည်ဆိုလား

ကလေးတွေအော်နေတာကြားဖူးတယ်။

ကလေးတွေလဲမနေနိုင်

န ဝ တ တဲ့ ဟား ဟား ဟား ဟား ။

ဘာတွေဖြစ်ကုန်ပြီလဲ

ကောလာဟလတွေကများလိုက်တာ

အင်းလျားကန်ဘောင်မှာ

တယောက်မှမသေဘဲနဲ့များ

ရော်ဘာတုတ်နဲ့ရိုက်

ရော်ဘာကျည်ဆန်နဲ့ပြစ်

ရော်ဘာလက်နက်နဲ့ထိုးတာလေးများ

ဪ ရော်ဘာခေတ်၌ဖြစ်လာရလေ

ဒို့တတွေမှာ ။

ဘာတွေဖြစ်ကုန်ပြီလဲ

ဗမာကိုမြန်မာပြောင်းတော့

မယ်ဗမာလဲမယ်မြန်မာဖြစ်

ဒို့ဗမာအစည်းအရုံးလဲ ဒို့မြန်မာအစည်းအရုံးဖြစ်

မောင့်ဘက်တန်အော့ဖ်ဗားမားတောင်

အသေစောလို့..။

ဘာတွေဖြစ်ကုန်ပြီလဲ

ကြမ်းခင်းစျေးသုံးနှစ်နဲ့

ထောင်ဒါဏ်လေလံပစ်ပွဲကြီးမှာ

ကျက်သရေရှိတဲ့တပ်မတော်ကြီးကို

မြင်ချင်တယ်ဆိုတဲ့သူ

ထောင်ဒါဏ်အနှစ်နှစ်ဆယ်ဗိုလ်စွဲသွားပြီ။ 

ဒါလေးများ 

ရွှေတိဂုံဘုရားကြီးတောင်

ခံဝန်ချုပ်နဲ့စံမြန်းနေရရှိတာကပဲ။

ဘာတွေဖြစ်ကုန်ပြီလဲ

စာပေငြိမ်ဝပ်ပိပြားမှုတည်ဆောက်ရေးအဖွဲ့တဲ့လေ

မျက်မှန်စိမ်းတပ်ထားသူက ဥက္ကဌ

ဦးလေးတွမ်က ဒုဥက္ကဌ

အလို

ရေးဘော်ရေးဘက်တွေကြမ်းပိုးကိုက်လို့

အိပ်မပျော်တဲ့အချိန်မှာ

ခန်းဆောင်နီထဲမှာ

ပန်းရောင်အိပ်မက်မက်တဲ့သူ

လူတကာ ထောင် ဆုရတဲ့အချိန်မှာ

သောင်းဆုယူမဲ့သူ

အရိုးတောင်ကိုကျော်၍

သွေးပင်လယ်ကိုဖြတ်မည်တဲ့လား။

ဘာတွေဖြစ်ကုန်ပြီလဲ

ကြုံတုံးပြောရအုန်းမယ်

ဟိုလူကြီးနိုင်ငံရေးကအနားယူတာ

မယုံကြဘူးလား။

တကယ်ပါ

စစ်ရေးနဲ့စီးပွားရေးလောက်ကလေးပဲ

ဆုပ်ကိုင်ထားတာပါ။

ဘာတွေဖြစ်ကုန်ကြပြီလဲ

အမျိုးသားနေ့ဦးတည်ချက်သုံးရပ်က

ပင်နီမဝတ်ရ

ဗိုလ်ချုပ်ပုံမချိတ်ရ

ဒို့အရေး မအော်ရတဲ့

နယ်ချဲ့လက်အောက်မှာတောင်

စီတန်းကြွေးကြော်ခဲ့တယ်

အော်ဟစ်ခွင့်ရှိပါလျက်ကနဲ့

ခုကျမှ

ဪ

အရင်ကသူ့ကျွန်ဘဝ

ခုတော့  ငါ့ကျွန်ဘဝကိုး....။

ဘာတွေဖြစ်ကုန်ပြီလဲ

ယောလုံချည်အနက်ဝတ်လို့

ကျောင်းထုတ်ခံရတယ်တဲ့

နှစ်ပါတ်လည်နေ့မှာ ဝမ်းမနည်းရဘူးတဲ့

ကျဆုံးသွားတဲ့သူငယ်ချင်းတွေကိုသတိရရင်

လွမ်းဆွတ်ခြင်းဆိုင်ရာ ဥပဒေအရ

အရေးယူသတဲ့

ကျောင်းသားတွေတော်တော်ရိုင်းသတဲ့

လူကြီးကိုလူကြီးမှန်းမသိဘူးတဲ့

ဘုရားပေါ်ဘွတ်ဖိနပ်စီးတက်တဲ့သူတွေ

သေနတ်ခါးမှာချိတ်ပြီး

ဝါဆိုသင်္ကန်းကပ်သူတွေကပြောတာပဲလေ။

ဘာတွေဖြစ်ကုန်ကြပြီလဲ

တသက်မှာတခါသာ ဖတ်ရမယ့်စာအုပ်တဲ့

ရွှေမိဆေးလိပ်ကလွဲရင်မြန်မာပြည်မှာထိပ်တဲ့

ဗလာစာအုပ်ကလွဲရင်စောင်ရေအများဆုံးတဲ့

ချိုင်းစာရွက်ကလွဲရင်ရောင်းအကောင်းဆုံးတဲ့။

ဘာတွေဖြစ်ကုန်ပြီလဲ

မာရသွန်မိန့်ခွန်းကြီးကို

ခုလိုရှည်ရှည်ဝေးဝေးပြောပြရတာကတော့

တိုတိုပြောဘို့အချိန်မရလို့ပါတဲ့

ကုန်သွယ်ရေးရုံးနဲ့ ကုန်တိုက်

မှားပြောတဲ့သူကဥက္ကဌ

ကိုယ်အာဏာသိမ်းတဲ့ရက်စွဲကို

မေ့နေတဲ့သူက အတွင်းရေးမှူးတဲ့

ဪ ခေါင်းမရှိဘဲဦးထုပ်ဆောင်းနေကြတဲ့

ကာလကြီးပေပဲ။

ဘာတွေဖြစ်ကုန်ကြပြီလဲ

ဘာတွေဖြစ်ကုန်ကြပြီလဲ

ဘာတွေဖြစ်ကုန်ကြပြီလဲ။

_မင်းလူ