ဗုဒ္ဓ ဟာမရှိတော့ဘူး

ဘုရားသခင်ရှိသလားလို့ မေးရင်

ဘယ်တစ်ပါးလဲလို့ ငါပြန်မေးမယ်

လူတွေဘာကို ကိုးကွယ်နေသလဲလို့မေးရင်

ကိုယ့်အတ္တကိုယ် ပြန်ကိုးကွယ်နေကြတယ်လို့

ငါဖြေမယ်

လူတွေဘာကို ရွှေချနေသလဲဆိုရင်လဲ ကိုယ့်အတ္တကိုယ် ပြန်ရွှေချနေကြတာဘဲ

ထမင်းဆာနေတဲ့လူကို ဘုရားရှိခိုးခိုင်းလို့မရဘူး

ဗိုက်ဆာနေတဲ့အခါ ဆုတောင်းတွေကလဲ ဝါးစားလို့မရခဲ့

ဒါကို ဘိုးရင်းနိတ်နယ်ရဲ့ မာကပ်ဆီကျောက်မီးသွေးတွင်းတွေကနေ

ဗင်းဆင့်ရဲ့ အာလူးစားသူများနဲ့အတူ ငါသိခဲ့ရ

ကယ်ဗင်ကာတာရဲ့ တောင်အာဖရိက ကဓာတ်ပုံတွေက ငါ့ဘုရားကိုရိုက်ခတ်ခဲ့

ပူလစ်ဇာဆုရပြီး တစ်နှစ်အတွင်း

သူကိုယ်တိုင်ရိုက်ခဲ့တဲ့ ဓာတ်ပုံတွေနဲ့အတူ

သေကြောင်းကြံစည်သွားခဲ့တာကိုလဲ ငါမအံ့သြတော့ဘူး

ဗင်းဆင့်ရဲ့ သေကြောင်းကြံစည်မှုဟာလဲ သူ့ဘဝလောက်တော့ ကြေကွဲစရာမကောင်းခဲ့

မြို့မငြိမ်းကတော့ ဗိုက်ဆာလို့ အုတ်ကားအောက်ဝင်ခဲ့တာတော့ မဖြစ်နိုင်လောက်ပါဘူး

ကတ်ကိုဘိန်းနဲ့ ဂျက်လန်ဒန်ကကော 

သေချာတာတော့ ထမင်းမဆာခဲ့ပေမယ့် သူတို့အားလုံး တစ်ခုခုကိုတော့ ဆာလောင်နေခဲ့ကြတယ်

ငါကကော ဘာကိုဆာလောင်နေခဲ့သလဲ မသိသေးပေမယ့်

မိဘမဲ့ကျောင်းက ကလေးတွေ ဘာကိုဆာလောင်နေသလဲဆိုတာကိုတော့ ငါအသေချာသိတယ်

ကလေးတွေဆာလောင်နေချိန်

ရွှေအထပ်ထပ်နဲ့ ရုပ်ထုတွေက ထလာပြီးမျက်ရည်သုတ်မပေးဘူး

ဗုဒ္ဓ ဟာမရှိတော့ဘူး

ဆာလောင်နေတဲ့ ကလေးတွေကတော့မနက်ဖြန်တွေထိရှိနေဦးမှာ 

မနက်ဖြန်ဆိုတာတွေ ဒီနေ့ဖြစ်လာသည်အထိဝမ်းထဲမှာ ထမင်းတစေ့မဝင်သေးဘူး

ဗုဒ္ဓကို ငါမစော်ကား

ဗုဒ္ဓကို ငါလေးစားတယ်

ဒါပေမယ့် ဗုဒ္ဓကိုငါမကြောက်

အကြောက်တရားဟာ သက်ဝင်မှုမဟုတ်

ရွှေထီးနန်းစွန့်ခဲ့တဲ့ ဗုဒ္ဓကို ရွှေတွေချနေတာတာမြင်တိုင်း ငါ့ရင်ထဲကအလိုလိုမွန်းကြပ်

မိဘစကားနားမထောင်တိုင်း ငရဲကြီးမယ်ဆိုတဲ့စကားကြားရင် ဗုဒ္ဓ ဟာနေရထိုင်ရခက်နေမလား

ဆုတောင်းတွေတစ်ဝကြီးနဲ့ ဗုဒ္ဓ ဟာဖန်ဆင်းရှင်အလား

 ဗုဒ္ဓဒဿနတွေကို ငါသဘောကျတယ်

လောကမှာငါစိတ်ဝင်စားတဲ့အဘိဓမ္မာနှစ်မျိုးဘဲရှိတယ် 

ဗုဒ္ဓအဘိဓမ္မာနဲ့ အနုပဋိလောမအဘိဓမ္မာ

ဆာလောင်နေတဲ့ကလေးတွေအတွက် 

ဗုဒ္ဓရုပ်ထုက ရွှေတွေခွာကျွေးမိရင် ငါအဝီစိရောက်လေမလား

ဗုဒ္ဓ ဟာရွှေတွေအထပ်ထပ်နဲ့ လူတွေရဲ့အတ္တတွေနဲ့ ဘယ်လောက်များမွန်းကြပ်နေလိမ့် 

တရုတ်အမွှေးတိုင်တွေနဲ့ မီးခိုးပါမွှန်အောင်လုပ်တော့ 

ဗုဒ္ဓ သာတကယ်ရှိရင် ပလ္လင်ပေါ်ကထွက်ပြေးမလားဘဲ

ဗုဒ္ဓ ဟာမရှိတော့လို့သာ 

ဗုဒ္ဓ သာရှိနေသေးရင် ဆာလောင်နေတဲ့ကလေးတွေအတွက် မြသပိတ်နဲ့ဆွမ်းခံကျွေးလေမလား

ရယ်ဖို့ကောင်းတာကတော့ ဒီနေ့ခေတ်သူ့နောက်လိုက်ဆိုသူတွေနဲ့ကိုးကွယ်သူတွေ ဆာလောင်စွာငိုယိုသံတွေကိုနားမစွင့် ဂေါပကရဲ့အလှူခံဗုန်းထဲဘဲ စက္ကူတွေထည့်ရင်ကုသိုလ်ရသတဲ့

ဗုဒ္ဓ ဟာမရှိတော့ဘူး

ဆာလောင်နေတဲ့ကလေးတွေနဲ့ ဘေးဒုက္ခသည်တွေကတော့ နောင်နှစ်ပေါင်းများစွာထိ ဒီကမ္ဘာမှာသက်ဆိုးရှည်နေ........။

အလယ်က အိုးကြီးမှာ ရေတွေလျှံထွက်

ဘေးအိုးတွေ ရေတစ်စက်မထည့်

ကောသလဟာ မေးငေါ့နေမလား

အို လူတွေ အသိဥာဏ်မဲ့

ဒီနိုင်ငံ ဗုဒ္ဓသာသနာထွန်းကားသတဲ့

ငါလှောင်ချင် ဒီလူမျိုးကို

ဒီနိုင်ငံ ဗုဒ္ဓနဲ့ ဝေးဆဲ......။ 

- Empty

Photo-ကယ်ဗင်ကာတာ(Kevin Carter)၏ တောင်အာဖရိကမှ ပူလစ်ဇာဆုရဓာတ်ပုံ

#ငါသိတဲ့ကဗျာဆိုတာဒီလိုမျိုးကွ