"ဘာတွေ ဖြစ်ကုန်ကြပြီလဲ"

"ဘာတွေ ဖြစ်ကုန်ကြပြီလဲ"

(၁) အော်  ဒုက္ခ ဒုက္ခ  

သူတို့ကြီးစိုးတဲ့ခေတ်မှာ 

အာဇာနည်ဖြစ်ရတာ 

မစားသာပါလားနော်။ 

တစ်နှစ်တစ်ခါ 

ဝတ်ကျေတန်းကျေ အလေးပြုခံရ 

ဥက္ကဋ္ဌကြီး၏ လမ်းညွှန်မှုဖြင့်လို့ 

တစ်လျှောက်လုံး အော်ခဲ့ပြီး 

မအောင်မြင်ဘဲ ကျဆုံးတော့မှ 

 ဗိုလ်ချုပ်အောင်ဆန်း လမ်းညွှန်ခဲ့တာပါလို့ 

လက်ညှိုးထိုး တရားခံလုပ် ခံရ၏။ 

သမီးအရင်းခေါက်ခေါက်တောင် 

လွတ်လွတ်လပ်လပ် ပန်းခွေချခွင့် မရ။ 

 

 

(၂)ရွှေတိဂုံစေတီတော် ဝတ္တကမြေထဲမှာ 

ကျူးကျော်ဆောက်လုပ်ထားလို့ဆိုပြီး 

အာဇာနည်ဗိမာန်ကို 

လှိုင်သာယာ ပို့မပစ်တာပဲ 

ကျေးဇူးတင်ရမလိုလို 

တိုင်းပြည်ကို ချစ်သောတပ်မတော် 

မျိုးချစ်စိတ်ရှိသော 

တပ်မတော် 

ပြည်သူကို 

ကာကွယ်ခဲ့သော 

တပ်မတော် 

ဗမာပြည်ကို 

ကယ်တင်ခဲ့သော 

တပ်မတော် 

သောက်ကျိုးနဲတော်တဲ့ 

တပ်မတော် 

လူတိုင်းပါးစပ်ဖျားက 

တော်တော် လို့ 

မြည်နေတဲ့တပ်မတော် 

အိမ်ယာမဲ့တွေကို 

ရေမီးအစုံနဲ့ 

ပြန်လည် 

နေရာချထားပေးတာကိုပဲ 

ကြည့် 

ဟုတ်တယ်လေ 

မိုးတွင်းမှာ ရေကြီးတယ် 

နွေမှာ မီးလောင်တယ် 

ဒါက ရေမီးအစုံ 

မဟုတ်ဘူးလား။ 

 

 

(၃) ဒီမိုကရေစီအရေး 

လှုပ်ရှားတဲ့ 

သံဃာတော်တွေကို 

သင်္ကန်းဝတ်တွေတဲ့ 

ဘောင်းဘီဝတ်တွေက 

စွပ်စွဲတာလေ 

ပြီးတော့ သူတို့ပဲ 

ဝါဆိုသင်္ကန်းနဲ့ 

လာဘ်ထိုးတာ 

နားမလည်နိုင်စရာ။ 

စစ်ကိုမုန်းလို့ 

စစ်တိုက်နေရတာပါတဲ့ 

ပုံပြောကောင်းတဲ့ 

ပုဂ္ဂိုလ်ကြီးရဲ့စကား 

ကြားဖူးပါတယ် 

အောက်မေ့နေ 

လက်စသတ်တော့ 

စတားဝါးစီမံကိန်းကို 

ကာကွယ်ပြောကြားသွားတဲ့ 

အမေရိကန်သမ္မတစကားနဲ့ 

သွားတူနေတာပါကလား 

ရေဂင် အလုံးက 

သူ့ပါးစပ်ထဲ 

ရောက်နေတာကိုး။ 

သတင်းစာဆရာကြီးများ သိတဲ့အတိုင်း 

မိမိတို့အနေဖြင့် 

ဟဝှာပြုလျှင် 

ဟဝှာပြုမည်ဖြစ်ကြောင်း 

ဟဝှာမပြုလျှင် 

ဟဝှာမပြုမည်ဖြစ်ကြောင်း 

ထို့ကြောင့် 

ဟဝှာပြုစေလိုကြောင်း  

သတင်း (အချိန်ကုန်) ထုတ်ပြန်ရေးအဖွဲ့ရဲ့ 

ရှင်းလင်းချက်ပေါ့ 

ရှင်းပါတယ်နော်။ 

 

(၄) ဟိုတစ်ယောက်လေ 

တွေ့တဲ့လူကို နေကောင်းလား မေးတဲ့လူ 

ဟိုလက်ညှိုးထိုး ဒီလက်ညှိုးထိုး 

ဘာမှလည်း နားမလည်ဘဲနဲ့ 

အဲဒါပေါ့ 

လက်ညှိုးညွှန်ရာ ဒုက္ခဖြစ်တယ်ဆိုတာ 

လာပါပြီ  လာပါပြီ  

နိုင်ငံတော်ပန်းခြံတည်ဆောက်ရေးအဖွဲ့ 

ဥက္ကဋ္ဌတဲ့  

 

(၅) သူ့ရဲ့ အနှစ်သက်ဆုံးဝါသနာက 

မိန့်ခွန်းပြောခြင်းပါတဲ့ 

ကိုယ်မပြောချင်ဘူး 

ဒါပေမဲ့ ပြောသင့်တာတော့ ပြောမယ် 

အဲဒါက ဘာလဲဆိုရင် 

 ကိုယ် မပြောချင်ဘူး ဆိုတာပဲ တဲ့ 

မှတ်သားလောက်ပါပေရဲ့ 

ကိုယ်တို့အစိုးရဟာ တရားဝင်အစိုးရ 

ကမ္ဘာက အသိအမှတ်ပြုထားတဲ့ အစိုးရ တဲ့ 

ဟုတ်ကဲ့ 

ကမ္ဘာမှာ အရှက်အနည်းဆုံး အစိုးရလို့ 

တညီတညွတ်ထဲ အသိအမှတ်ပြုကြပါသတဲ့ 

တိတိကျကျ မှန်မှန်ကန်ကန် 

မြန်မြန်ဆန်ဆန်လုပ် ဆိုတဲ့အထဲမှာ 

အခြေခံဥပဒေဆိုတာ 

မာရှယ်လောဥပဒေလို 

ချက်ချင်းထုတ်လို့ရတာ မဟုတ်ဘူးတဲ့ 

အာဏာလွှဲတယ်ဆိုတာ 

 

(၆) ဒါပေမဲ့ 

လွှဲမှာပါ  လွှဲမှာပါ 

ပုခက်လွှဲသလို လွှဲမှာပါ 

ဒေါက်တာမောင်မောင် စာအုပ်ဖတ်ကြည့် 

ဆရာမောင်မောင်ရဲ့ စာအုပ်ကိုကြည့်တဲ့ 

တခါလာလဲ ဒေါက်တာမောင်မောင် 

တခါလာလဲ ဒေါက်တာမောင်မောင် 

စာအုပ်ကြော်ငြာပေးတာလား 

ဒါဆို ဒီလိုလုပ်လေ 

ဆရာမောင်မောင်ရဲ့စာအုပ်တအုပ်ဝယ်ရင် 

ဆရာမောင်ဆေးနီမှုန့်တထုပ် 

လက်ဆောင်ပေးမယ်ဆိုရင် မကောင်းဘူးလား 

သိပ်ရောင်းကောင်းမယ်နော်။ 

ဒါနဲ့ နေစမ်းပါအုံး 

မိန့်ခွန်းပြောရင် ဘာဖြစ်လို့ ရယ်တာလဲဟင် 

သွားကြီးဖြဲဖြဲပြတာ ကြောက်စရာကြီး 

ရှေးက ကဗျာတပုဒ်ထဲက 

စာကြောင်းတကြောင်း သတိရမိတယ် 

ဘီလူးသွားကို လဖြဲ တည်းတဲ့ 

နိဂုံးချုပ်အားဖြင့် ပြောရရင် 

တပ်မတော်ရဲ့လက်ငင်းတာဝန်ကြီး သုံးရပ်ကတော့ 

ဒို့အဖေကြီးမို့ ကာကွယ်မလေ 

ဒို့အဖေကြီးမို့ ကာကွယ်မလေ 

ဒို့အဖေကြီးမို့ ကာကွယ်မလေ 

အလိုဗျာ  

ဘာတွေဖြစ်ကုန်ကြပြီလဲ။ 

-မင်းလူ