ဗုဒ္ဓ လမ်းစဉ် မဟုတ်သည့် ဘုရားဖူးခြင်း ဓလေ့" ------------------------------------------------

"---------------

မြန်မာပြည်မှာ လူအတော်များများဟာ ဘုရားဖူးဆိုပြီး ခေါင်းစဥ်တပ် ဘုရားကိုခုတုံးလုပ် ဘုန်းကြီးကို ခုတုံးလုပ်ပြီး အခါကြီး ရက်ကြီးတွေမှာ စုပြုံပြီး ဘုရားလည် ထွက်ကြ၊ အပျော်ရှာလေ့ရှိကြပါတယ်။

အခါကြီးရက်ကြီးမှာ ဘုရားရင်ပြင်တော်ပေါ်အထိ တက်ပြီး ဝတ်ပြု၊ သီလယူ၊ ပန်း၊ ဆီမီးကပ်ပြီးမှ ကုသိုလ်ယူလို့ ရတာ မဟုတ်ပါဘူး။

ဗုဒ္ဓမြတ်စွာဘုရားရှင်က သူ၏တပည့်များကို ဘယ်ကိစ္စကိုမဆို အကြောင်းအကျိုး၊ အကောင်းအဆိုး ၊ အမှားအမှန် ၊ အကျိုး ရှိ မရှိ ဥာဏ်ပညာနှင့်နှိုင်းချိန်ကြည့်ကာ အကျိုးမရှိသည့် အမှားတရားများကို စွန့်ပယ်နိုင်ဖို့နှင့် အကျိုးရှိသည့် အမှန်တရားလမ်းစဥ်များကိုသာ လက်တွေ့လျှောက်လှမ်းနိုင်ဖို့ကို အမြဲသွန်သင်ညွှန်ကြားဆုံးမပေးလေ့ရှိပါတယ်။

ဗုဒ္ဓမြတ်စွာဘုရားရှင်ကိုယ်တော်တိုင် ဝက္ကလိမထေရ်ကို -

ယော ခေါ, ဝက္ကလိ...

ဓမ္မံ ပဿတိ သော မံ ပဿတိ၊

ယော မံ ပဿတိ သော ဓမ္မံ ပဿတိ။

ချစ်သားရဟန်း ဝက္ကလိ ...

ငါလိုအပုပ်ကောင် ခန္ဓာကိုယ်ကြီးကို ထိုင်ပြီးကြည်ညိုနေရုံ ပူဇော်နေရုံ ဖူးမြှော်နေရုံမျှနှင့် ဘာမှအကျိုးမရှိပါ။ 

တရားကိုသိအောင်လက်တွေ့ကျင့်သုံးလိုက်နာပါ။ တရားကိုကိုယ်တိုင်ကျင့် ကိုယ်တိုင်သိမြင်ခံစားနိုင်မှသာလျှင် ငါဘုရားကို မြင်မည်။

ငါဘုရားကို တကယ်ပူဇော်ရာ ဖူးမြင်ရာရောက်မည်လို့ အထင်အရှားဟောကြားထားခဲ့ခြင်းဖြစ်ပါတယ်။

အခုမြင်တွေ့နေရတာက ဘာသာရေးလို့ ပြောရအောင်လည်း ဗုဒ္ဓအဟောနဲ့ ဆန့်ကျင်ဘက် ဖြစ်နေပါတယ်။ ဗုဒ္ဓအားမပေးခဲ့တဲ့ လမ်းစဉ်ဖြစ်ပါတယ်။

ပြီးတော့ အခုလို ကိုယ့်တိုင်းပြည်ကြီးကို စစ်မိစ္ဆာကောင်တွေက ဖျက်ဆီးလို့ စီးပွားရေး၊ ကျန်းမာရေး ၊ပညာရေ၊း လူမှုရေး အစစအရာရာ ယိုယွင်းပျက်စီးနေတဲ့အချိန်မှာ ကိုယ့်နိုင်ငံကြီး စစ်မိစ္ဆာကောင်တွေရဲ့လက်အောက်ကနေ လွတ်မြောက်ဖို့ဆိုပြီး ကြိုးစားကြရင်း အသက်ပေးသွားကြရတဲ့ ရဟန်းရှင်လူပြည်သူတွေ မတရားဖမ်းဆီးထောင်ချခံ အနှိပ်စက်ခံနေကြရသူတွေ မိမိမိသားစုဘဝအသက်အိုးအိမ်စည်းစိမ်အရာရာစွန့်လွတ်ကာ အသက်ပေးတိုက်ပွဲဝင်နေကြသူတွေ ရဲ့ဘဝတွေကို လူမှန်ရင် စာနာနားလည်ဖို့ကောင်းပါတယ်။

လူမှန်ရင် လူအသိစိတ်ဓာတ် မဖြစ်မနေ ရှိကြရမှာဖြစ်ပါတယ်။

တနိုင်ငံလုံးက အသက်တွေ၊ မိသားစုတွေ၊ ဘဝတွေ စွန့်လွှတ်ကြ၊ အဖျက်ဆီးခံကြပြီး အားလုံးစစ်ကျွန်ဘဝက လွတ်မြောက်ဖို့ ရုန်းကန်တိုက်ပွဲဝင်နေကြတဲ့အချိန် အခါကြီး ဖြစ်တယ်။

နိုင်ငံ့ခေါင်းဆောင်တွေကို မတရားဖမ်းဆီးအကျဉ်းချ၊ အပြစ်မဲ့ပြည်သူ ထောင်နဲ့ချီ သတ်ဖြတ်ခံရပြီး တနိုင်ငံလုံးက တော်လှန်စစ်ဆင်နွှဲနေကြတာကို ကိုယ်နှင့်မဆိုင်သလို လစ်လျူရှုပြီး ဘုရားဖူးထွက်ကာ အပျော်ကျူးနေကြတာကတော့ တကယ့်ကိုမှ လူ့အသိတရားကင်းမဲ့လွန်းရာကျပါတယ်။

ဗုဒ္ဓ မဟောခဲ့တဲ့လမ်းစဥ်ဖြစ်တဲ့ ဘုရားဖူးဆိုတဲ့ခေါင်းစဥ်အောက်မှာ ကိုယ့်ရင်ထဲက တဏှာလောဘအလိုဆန္ဒကို ဥာဏ်ပညာနှင့်ဆင်ခြင်စဥ်းစားမပိုင်းခြားနိုင်ကြဘဲ တဏှာအလိုဆိုးက ခိုင်းသည့်အတိုင်း ပျော်ချင်ပါးချင် မော်ကြွားချင်ကြတာဟာ ရှက်ဖွယ်လိလိ ပါပဲ။

ရဟန်းတပါးအနေနဲ့လည်း ဘုရားရင်ပြင်တော်တွေပေါ် မှာ တိုးဝှေ့နေကြတဲ့သူတွေကို ဗုဒ္ဓဘာသာဝင်ကောင်းတွေ လို့ မမြင်ပေးနိုင်ပါဘူး။ သာဓုလည်း မခေါ်နိုင်ပါဘူး။

ဘာသာရေးအကြောင်းပြပြီး အများဒုက္ခရောက်နေချိန်မှာ မေတ္တာစိတ်ခေါင်းပါးစွာ လျစ်လျုရှုပြီး တကိုယ်ကောင်းဆန်ဆန် ပျော်ပျော်ပါးပါး ကြောင့်ကြမဲ့ ခရီးသွားနေကြတဲ့သူတွေဟာ ဗုဒ္ဓရဲ့ လမ်းစဉ်ကို ဆန့်ကျင်ဘက် လျှောက်နေကြသူများ ဖြစ်တယ်။

တော်လှန်ရေးတိုက်ပွဲဝင်နေကြသူများကို ကူညီရာမရောက်သည့်အပြင် နှောင့်ယှက်ဖျက်ဆီးနေကြတဲ့ လူ့အသိတရားကင်းပျောက်ပြီး တဏှာဘီလူးဝင်ပူး အရူးထနေကြခြင်းသာ ဖြစ်ပါကြောင်းကို အသိပေးရေးသားလိုက်ပါတယ်။

မင်းသုည ( ဗုဒ္ဓတက္ကသိုလ် )

#thevoiceofspring #article